I 1970 vart Førde interkommunale realskule og gymnas oppretta. Realskulen vart nedlagd i 1974, men det nyoppretta gymnaset levde vidare. Utover på 70-talet oppstod tanken om ei samanslåing mellom Førde gymnas og Førde handelskule.

Først 1993 var dei to skulane slegne saman til ein skule under namnet Hafstad vidaregåande skule, men framleis i leigde lokale to stader i Førde, på Sanderplassen og i Elvegården. Fem år følgde med strevsam pendling mellom Sanderplassen og Elvegården, for både lærarar og elevar.

16. august 1999 vart ein merkedag. Då kunne ein ønskje elevane velkomne til vakre, moderne og praktiske lokale på Hafstad, bygde for skule og undervisning. Tomta var den gamle yrkesskulen, der Tømmerdal først starta ein metallfagskule i 1930-åra. Det austlege bygget til yrkesskulen er inkorporert i det nye skulebygget.